Os Centros Especiais de Emprego (CEE) son empresas que nacen como ferramenta de empregabilidade para persoas con discapacidade na Lei de Integración Social das persoas con discapacidade (LISMI) de 1982. Por iso, como mínimo, o 70% do seu persoal debe estar constituída por persoas cunha discapacidade igual ou maior ao 33% .
Atópanse regulados no Real Decreto Lexislativo 1/2013 do texto refundido da Lei Xeral dos Dereitos das Persoas con Discapacidade e a súa Inclusión Social e no Real Decreto 2273/1985, do 4 de decembro, polo que se aproba o Regulamento dos Centros Especiais de Emprego. Así mesmo o Real Decreto 1368/1985, do 17 de xullo, regula a relación laboral de carácter especial dos traballadores con discapacidade que traballen nos CEE, aínda que, contén numerosas remisións ao Estatuto dos Traballadores.
O seu obxectivo principal é o de realizar unha actividade produtiva de bens ou de servizos, participando regularmente nas operacións do mercado, e teñen como finalidade o asegurar un emprego remunerado para as persoas con discapacidade; á vez que son un medio de inclusión do maior número destas persoas no réxime de emprego ordinario.
Os Centros Especiais de Emprego deberán contar con Unidades de Apoio que permitan a adquisición por parte dos traballadores de habilidades, tanto profesionais como sociais, que contribúan a mellorar a súa autotomía así como a súa integración Laboral e Social (Servizos de Axuste Persoal e Social).