A Coruña, 13 de setembro de 2023. O emprego das persoas con discapacidade e as previsións legais no seu acceso ao mercado de traballo centraron esta mañá a sesión informativa coa que arrincou en Galicia o proxecto “Capacitad@mente” , un programa formativa orientado en exclusiva para persoas que sofren un trastorno mental severo e no que colaboran Cegasal, o Sergas e Janssen España.
Expertos en dereito e na área de psiquiatría participaron nesta xornada celebrada na Asosiciación Pro Enfermos Mentais, na Coruña, na que se explicou a pacientes, familiares e médicos as implicacións e valores deste plan de formación que lévase xestando varios anos e que foi presentado publicamente en Santiago o pasado mes de xullo.
Cegasal, a Asociación Empresarial Galega de Centros Especiais de Emprego Sen Ánimo de Lucro, pon ao dispor do proxecto os seus centros asociados, onde os alumnos seleccionados recibirán unha formación eminentemente práctica durante 5 horas ao día. Do que se trata é de, por unha banda, lograr a visibilización das persoas con problemas de saúde mental; e por outra, desenvolver tarefas que permitan aos participantes a súa familiarización con empresas de economía social cuxa razón de ser son, precisamente as persoas e, concretamente, as que teñen maior dificultade para acceder ao mercado laboral. Tal e como destacou na súa presentación o presidente de Cegasal, Herminio Martínez, “CAPACITAD@MENTE “é un proxecto pioneiro en España, que se pretende estender, nos próximos anos, a todo o territorio galego”.
As prácticas, deseñadas por Cegasal e responsables médicos do Sergas constarán de 30 horas teóricas 18 ao 29 de setembro) e entre 80 e 100 horas prácticas (de outubro a novembro). Sempre cun programa adecuado para persoas con trastornos de saúde mental, incidindo na ruptura do seu illamento e no fomento da súa empregabilidade como individuos capaces dentro dunha sociedade saudable e xusta.
Entre os asistentes ao evento destacou a presenza de Carlos Vázquez Ventoso, xefe da Área de Psiquiatría do Complexo Hospitalario da Coruña, e José Luis Álvarez, director rexional de Relacións Institucionais de Janssen.
25 anos, 2.162 empregos e 44 millóns de euros de facturación
Cegasal cumpriu en 2022 os 25 anos de vida e conseguiu que o 96% dos persoais dos 32 centros que alberga sexan persoas con discapacidade. O obxectivo para os próximos anos é aumentar a taxa de creación de emprego un 20%, é dicir, xerar 400 postos de traballo máis. Na actualidade, os centros especiais de Cegasal, no seu conxunto, facturan máis de 44 millóns de euros e dan emprego a 2.162 persoas con discapacidade.