Santiago de Compostela, 3 de setembro de 2024. A Asociación Galega de Centros Especiais de Emprego sen Ánimo de Lucro (Cegasal), que agrupa a 31 empresas que integran laboralmente a persoas con discapacidade, manifestou a súa preocupación tras a publicación do “Estudo sobre os resultados laborais e salariais das persoas con discapacidade” da Organización Internacional do Traballo (OIT). Este documento revela unha alarmante brecha salarial do 12% a nivel mundial entre traballadores con discapacidade e o resto da poboación. En países de ingresos baixos e medios, esta diferenza pode chegar ata o 26%, o que reflicte as serias dificultades ás que se enfrontan estas persoas no acceso a empregos dignos e ben remunerados.
O informe subliña que as persoas con discapacidade, ademais de recibir menores salarios, teñen máis dificultades para acceder ao mundo laboral, o que a miúdo as empuxa cara ao autoemprego ou empregos precarios. Este problema é aínda máis grave para as mulleres con discapacidade, quen, ademais da brecha salarial por discapacidade, enfrontan unha brecha de xénero adicional, o que agrava a súa situación de vulnerabilidade.
En Galicia, esta realidade tamén está presente. Aínda que os centros especiais de emprego de iniciativa social son unha ferramenta clave para a inclusión laboral, é evidente que queda moito por facer para reverter estas cifras. Por iso, Cegasal pide a colaboración do tecido empresarial e das administracións públicas para que adopten medidas efectivas que permitan reducir esta brecha e garantir que as persoas con discapacidade poidan acceder a un emprego digno e equitativo.
"Non podemos permitir que en pleno século XXI as persoas con discapacidade sigan enfrontándose a estas barreiras estruturais. A inclusión laboral non só é un dereito, é unha necesidade para construír unha sociedade máis xusta", sinalou Mino Martínez, presidente da Asociación.
Emprego inclusivo e formación adaptada
Entre as medidas propostas pola OIT para mellorar esta situación atópanse o fortalecemento das políticas de emprego inclusivo, a formación adaptada ás necesidades das persoas con discapacidade, e o fomento de contornas laborais accesibles. Tres medidas propostas tamén por Cegasal nas diferentes reunións que mantén regularmente coas administracións.
27 anos, 2.162 empregos e 44 millóns de euros de facturación
Cegasal cumpriu en 2024 os 27 anos de vida e conseguiu que o 96% dos persoais dos 31 centros que alberga sexan persoas con discapacidade. O obxectivo para os próximos anos é aumentar a taxa de creación de emprego un 20%, é dicir, xerar 400 postos de traballo máis. Na actualidade, os centros especiais de Cegasal, no seu conxunto, facturan máis de 44 millóns de euros e dan emprego a 2.162 persoas con discapacidade.